Mis Volontariat in Latacugna

Wie scho erwähnt, verbring ich mini erste 8 Mönet, sprich Januar bis September in Ecuador, gnauer gseit in Latacugna, das isch en Stadt ca. 2.5 Stund südlich vo Quito, de Hauptstadt vo Ecuador. In Latacugna wird ich binere Gastfamilie wohne und im Chinderheim schaffe. Für die wo gnaueri Infos wänd :   http://www.hogarparasusninios.org/index.php/nuestras-casas/latacunga oder ihr döffet euch gärn bi mir mälde!

 

Ich bliebe 8 Mönet in Latacugna well das Volontariat als Vorpraktikum ich de Schwiz ahgrechnet wird und ich 1000 Sozialstunde bruche für mis Studium nocher. Plant isch dänn Sozialiarbet/Sozialpädagogik in Züri z'studiere.

 

Rückblick nach es paar Wuche zrugg diheime

Zit lauft und scho esch Dezember, scho beni 5 Wuche wieder diheime und scho sind 3 Mönet vergange, set ich mech vo mine Liebste en Ecuador han verabschidet…. Heicho isch wunderschön, ned immer eifach, vorallem wenn mer sone grosse Teil vo sim Härze neumet gloh het und so viel neui Erfahrige gsammlet het und ich glaube hauptsächlich au, wenn mer en langi Zit elleige gsi isch. Wenni mini Zit bzw. mis 2018 revue loh passiere, muessi schmunzle und Träne füllet mini Auge glichzitig… es Gfüehlschaos - DANKBARKEIT - VERBUNDEHEIT - ganz viel LIEBI. Ich han eh mim Volontariat so viel glernt. Esches immer eifach gsi? Ganz ehrlich, es isch alles andere als eifach gsi. 

Am meiste han ich glaub mich selber kenneglernt. Plötzlich bisch elleige im frömde Land, wit weg vo diheime, die frömdi Sproch, die neui Kultur und denn s'Chinderheim. Es geht viel Mönsche, wo devo tröime einisch im Chinderheim z'schaffe. Somit bin ich sehr priviligiert, so öpis döffe erlebt z'ha. Jedoch isches emotional definitiv ned immer s'gäle vom Ei. Ich, wo generell scho sehr emotional bi, han Schicksal miterlebt, wo mich s'Läbe lang wärde präge, wo mich lönd s'Läbe do täglich enorm z'schätze, mir aber au zeiget, wie viel z'viel mir vo allem händ. Es isch unbeschrieblich, was für en Bindig ich mit de Chinder ufbauet han. Wie fest ich jedes einzelne in mis Härz gschlosse han und wie sehr ich mich freue, wenn ich em Juni mit mim Mami wieder uf Ecuador wird reise und alli mini Liebe go bsueche. Es isch ned mol eh Wuche gange und ich han scho wieder Flög usegsuecht. Es isch ganz anders, wie woni vor bald 5 Jahr för 8 Mönet nach Australie gange bin. Innerlich han ich wies verlange und de Drang, wieder zrugg z'goh, wills ned eifach es Volontariat isch gsi, sondern en Herzensahglegeheit. 

Au in Kontakt bi  ich mitem Heim und minere Gastfamilie und mine Fründe, wo ich kennegletn han in Ecuador und mittlerwile bin ich scho die zweiti Bekannti Person am vermittle, wo gern is Chinderheim will go schaffe. 

Es chunnt etz wahrschindlich chli übere, als ob ich mich ganz und gar nonig ihgläbt han do zrugg Aber das isch ganz und gar ned de Fall. Ich gnüsses sehr, wieder diheime z'sie bi minere Familie und mine Fründe. Es isch schön, ane vertroute Ort hei z'cho und so viel liebevolli Mensche um sich z'ha. Am Ahfang chli vell, die erste 2 Wuche hani Müeh gha und au jetzt ab und zue geht's Täg, do esch alles chli viel, vorallem bin ich nochem schaffe no direkt 3 Mönet go reise. Ufd Galapagos, gwüssi Teil vo Ecuador, woni nonig gseh han und denn nach Peru und nocher vo Bolivie uf Costa Rica. Würkli viel Zit zum alles verarbeite hani jo au ned gha mit dene neue nomol viele Ihdröck, drum hani s'Gfüehl das ganze bi  ich jetzt Stück für Stück am verarbeite und es wird immer en riese Teil vo mir sie und bliebe und ich zähle scho Täg bis im Juni... 

Schlussendlich will ich no gärn Danke säge: Danke ICYE und Vase, für die super Organisation und s'do sie ich de Schwiz und vor Ort, Danke ahd Mercator-Stiftig für die finanzielli Unterstützig - findes unglaublich toll, dass ihr junge Mänsche, wie mir hälfet en Traum z'erfölle! Und schlossendlich jedem einzelne, wo sich Zit gno het mini Gschichtli z'läse und natürlich minere Familie und mine Fründe - es isch schön eu wieder um mich ume z'ha.

ADIOS - nos vemos…..

So schnäll esches gange ond ich bin wieder diheme…. zrugg ih de Schwiz und scho ofem weg in Alltag. 

De Abschied im September isch mer unglaublich schwer gfalle und es sind sehr viel Tränli gflosse. Ha immer de Bammel gha vor dem Tag willi genau gw¨sst han, wie fest weh mir das due wird. Jo leider het mer kei Wahl und de Tag isch do gsi. 

Ich ha mer lang öberleit, wasi ehne schänke söll. Ergend es Ahdänke ah eusi geinsami Zit und han denne Föteli bestellt und zwei Bilderrähme bastlet mit ganz viel Föteli vo de Chinder und Sache, wo mer zäme erläbt hend. 

Ah mim letschde Tag hani mi scho chli gwunderet wieso so viel Tias eh de Chuchi sind, wo eigentlich frei hend. Debi hends es riese Abschiedszmittag gmacht för mech. Was für en schöni Geste. Am Schluss simmer ca. 30 Persone am Tisch gsi. So viel sind verbi cho, wo eigentlich frei hend gha zu s'letschde mol met mer ässe und mir so ihri Dankbarkeit zeige. Chönnet euch jo vorstelle 30 Fraue ah eim Tisch, was för eh Hülerei….. Aber epis sehr positivs isch, dass ich en Nochfolgeri becho han und sie no ha chönne kennelerne und ihschaffe. Somit han ich immer öper, wo mer brechtet und mich ufem neuste Stand haltet. 

Min Plan isch nöchst Johr em Juni nomol verbi z'goh, eifach eh mine Ferie und es bsüechli go mache. Muess sege chan das ned eifach abschlüsse jetzt. D'Chinder, alli Ahgstellte und Ecuador, sowie mini Gastfamilie, sind en sehr wichtige Teil eh mim Läbe worde und Familie!

 

Mini letschde Täg im Heim

Ond scho esches August..... de Monet Juli isch för mich persönlich ned grad blendend gsi, drumm hani mich au ned wörkli möge schriebe. Bi gsundheitlich sehr ahgschlage gsi und han glaub alles gha, was mer chan ha.... aber jetzt gohts mer weder super. 

 

Zurzit befind ich mich scho eh de letsche Wuchene vo mim Voluntariat und ich chan gar ned glaube wie schnell die Zit vergange isch.... 8 Mönet im Flug.... und wie ihr wüsset, bini ned so guet em Absched neh, drum bini mich momentan innerlich uf de Abschied am vorbereite. 

Aber eh gueti Nachricht geht's natürlich au, allne Chinder gohts super und alli sind gsund und munter! 

De Monet Juli und August sind Schuelferie (eh de Berge) und somit hemmer de ganz Tag chli meh Chinder im Heim und probieret viel Aktivitäte wie in Park goh met de Chender, mol es Glace go esse etc. z'mache, dass sie ned glangwilt send. 

Summermönet do bedüte au SUmmerferie diheime bzw. in Amerika und somit hemmer momentan viel Gruppene vo Freiwillige, wo ca. immer ein Wuche im Heim sind und mithelfet. 

 

Zudem isch letschd Wuche d'Rocio ihd Adoption und het etz en liebendi Familie... mir sind alli überglücklich, doch de Absched isch eus sehr chwer gfalle, will s'Rosie set sie 2 Stund alt isch gsi bi eus im Heim isch gsi und etz met 8 Mönet (das isch sehr jung und au die Jüngsti ich de Gschicht vom Heim, wo je ihd Adoption isch) scho es diheime het. Bi ihre isches so schnell gange well kei Familie bekannt isch und sie dazmols im Dezember eifach vorem Heim glege isch.... leider ned de schönsti Start is Läbe, drum freuts eus etz umso meh, dass sie so jung es Mami und en Papi het. 

 

Suscht isches ziemlich ruhig momentan und s'geht ned so vell z'brichte. 

 

 

 

 

 

Muettertag

In Ecuador isch Muettertag es riese Ding..... ah jede Strosseegge werde Gschänkli verchauft, Chüeche verziehrt und eh de Schuel geht's es riese Programm, wo d'Müettere ihglade werde. Zerst hani denkt, dass das im Heim sicher ned so gross zelebriert wird, da viel Chinder kei Eltere hend oder halt schlechti Erfahrig gmacht hend. Jedoch hani mich tosche und bi eus isch usgibig gfiret worde. Es isch denn ned Muettertag sondern Tiatag also Tantetag gnennt wurde. So werde die Ahgstellte gnennt, wo ufd Chinder luege. Mir hend alli zäme tanzed, gsunge, Spieli gmacht, Gschänkli verteilt und gässe... würkli en schöne Tag! 

 

Muettertag für mich persönlich en wundervolle Tag und au en Tag wo gschätzt set werde, mich aber au sehr nachdenklich gmacht het. Eh de letschde 4 Wuche hemmer 4 neui Babies im Heim becho und mit Babies meini 3 Täg alt, 10 Täg alt, 2 Wuche und 3 Mönet. Es isch schwer z'begrife oder besser gseit z'akzeptiere, dass es in Ecuador so viel Chinder giht, wo verstosse werde oder ungwollt sind. Ich meine wenn be eus es Baby ehd Babyklappe geh wird, denne isch das 1 mol em Johr und es wird es riese Ding drus gmacht und do in Ecuador isch das wie am Flüssband. Mir isch bewusst, dass mer Gschichte dehinter ned alli kennt, vorallem wenn s'Chind in de Kartonschachtle vors Heim gleiht wird, aber wiederum gsehni das ned als Entschuldigung und das isch de Teil vo mim ganze Ustusch do, wo mi hässig macht und woni eifach kei Wort dezue finde. De einzig Trost isch, dass sie jetzt bi eus sind, imerene wunderschöne Heim, wo voll mit Liebi isch und dass sie hoffentlich bald es Mami und en papi hend, wo sie vo ganzem herze liebet. 

 

LEtschd Fritig isch en neui chlini Muus bi eus ihtroffe und da sie au usgsetzt worde isch, het sie ned mol en Name gha, wo sie bi eus ihtroffe isch.... Sie isch für Ecuadorianischi Verhältnis sehr wiiss... so wiiss wie ich... churzerhand hend die im Heim denne beschlosse, dass die chli jetzt Delia heisst. Das esch sone schöni Geste mir gegeöber und ich ha mi scho öber beid Ohre eh die chli Muus verliebt.... 

 

Update 06.05.2018

So ich glaube es isch höchsti Zit wieder mol öpis z'schriebe. Die letschde paar Wuche sind chli turbulent gsi und ich han zerst alles chli müesse loh sacke, bevor ich über das alles chan schriebe, aber jetzt hani ganz vieles zum verzelle! 

Ich han mich sehr guet ihgläbt und füehl mich pudelwohl. D'Arbetstäg sind sehr sehr sträng und eh ruhigi Minute geht's fast ned, aber ich gnüsses richtig und langwillig wird's mer nie. 

Wie scho gseit send die letschde Wuche chli en Achterbahn gsi vo guet und schlecht und ihr wüsset ich bin en sehr emotionale Mönsch und alles, was passiert isch, isch unterwartet gsi und Neuland för mich. 

Leider hemmer es Meitli verlore, Thalia isch gstorbe am 8. April ganz unerwartet. Sie isch zwar schwerstbehindert gsi und im Rollstuehl und au künstlich vo eus über en Magesonde ernährt worde, aber ihre isches de Umständ entsprechend sehr guet gange und eigentlich Berg uf. Leider het ihres Kämpferherz denn ufgeh und au d'Ärzt hend nur no de Tod chönne feststelle em Spital. Es isch grad chli en Schock gsi, wo ich am Mentig am Morge go schaffe bin und s'gheisse het ich söll unbedingt ufe (is Casa Esperanza, wo sie glebt het) goh, es sigi epis schlimms passiert. In Ecuador isch de gröscht Teil katholisch und do isches eso, wenn öpert stirbt, stellt mer de Sarg uf und baut wie en Altar uf, wo mer sich chan vo de tote Person verabschide und das isch au bi eus de Fall gsi. Die wo mich guet kennet, wüsset, dass ich guet mit em Tod chan umgoh und au kei Angst devo han mich dem z'stelle, aber sie, de chli Chinderkörper ich dem Chindersarg, het mich recht troffe. Mir hend denn no am Mentig Obig ehri Gedenkfir eh de Chele gha und sie begrabe ufem Friedhof. De einzig Trost isch,  dass es ihre jetzt sicherlich besser goht und sie wieder gsund chan sie und umerenne, lache und am bessre Ort isch.... 

 

Wie ich gschriebe han sind be eus em Heim viel Chinder Waise oder d'Eltere ned bekannt, drogeabhängig und no x Sache meh... Im April hani zum erste mol en Adoption miterlebt. D'Susanna 2 jährig isch adoptiert worde  vo merene Päärli us Ecuador. 

Sie isch set churz noch de Gebort im Heim gsi und ihri 3 ältere Gschwüsterti sind au scho be eus im Heim gsi und hend es neus diheime gfunde. Eigentlich trurig und unvorstellbar, wie en Muetter und en Vater s'vierte Chind uf die Welt bringt und ihne zum 4. mol es Chind weggnoh wird und zur Adoption freigeh wird... unvorstellbar so epis bi eus, aber anderi Länder, anderi Sitte... In Ecuador isches normal, dass mer eh mim Alter scho Muetter isch und be de Ihheimische foht de ganzi Spass met 14ni ah... meh dezue spöter. Uf all fäll sind denn ändlich ahfangs April d'Papier, dass d'Susanna zur Adoption frei geh wird ihtroffe und d'Sozialarbeiter hend afo en passendi Familie sueche. Sobald die denn paar Woche spöter festgstande isch, het d'Susanna  es Buech becho vo de Eltere und es Video, wo sie sich vorstelle, s'diheime zeige und Föteli vo ihne und de ganze Familie. Met de zwei Psychologe, wo bi eus im Heim fest stationiert sind, well mir viel Chinder mit Trauma hend, isch sie uf de Bsuech vorbereitet wurde und au mir hend sie probiert so guet wie mögich druf vorbereite. Denn isch die entscheidendi Wuche cho und am Mäntig hend sie sich zum erste mol troffe. Ehri Eltere hend denn Mentig bis Donnstig mit ihre im Heim verbrocht und halt mit Ihre gesse, gspielt, sie badet, halt alles gmacht, was mir suscht mache halt eifach ohni eusi Hilf und unter Ufsicht vo eppe 4 Psychologe und 4 Sozialarbeiter. Am Donnstig hend d'Eltere grüens Liecht becho und d'Susanna het döffe be ehne pfuse uf de Fritig, das isch denn "d'Härteprob" und zum Glück isch alles guet gange und sit denn isch s'Susi diheime acho. Wenn es Chind adoptiert wird, bechunnts bzw. d'Eltere en Ordner oder meh es Buech mit Föteli, de erste Hoor, de ersti Fingernagel, Fuess und Händabdrock, de ersti Zah, wo usgheit halt allErinnerige und au Erinnerige ah die Zit em Heim und jedi Tia schriebt ehre en persönliche Brief. Würkli es ganz schöns Gschänk und das wird denn au viel Froge kläre, wenn die ergendwenn ufchömet und die werdet bestimmt. Uf all Fäll isches ned eifach es Chind loh goh loh, aber es isch s'schönste wo dene Chinder chan passiere, wenn sie endlich es diheime hend und es Mami und en Papi. Ich wünsch minere chline Muus, dass sie soviel Liebi bechunnt, wie sie nur chan! 

 

Es het no zunere zweite Adoption vom Louis selle cho d'Wuche druf und mir hend ihn alli au wied Susanna druf vorbereitet und denn sind leider sini Adoptiveltere in letschder Sekunde abgsprunge.... au das gihts leider, aber zum Glück, döffet die nie meh es Chind adoptiere! Jetzt isches eso, sobald d'Sozialabreiter s'ok vo de Psychologe hend, wird en neui Familie för ihn gsuecht... aber zerst muess er das au verdaue, aber er machts ganz guet und Chinder vergesset gwüssi Sache zum Glück ganz schnell! Ich hoffe eh de nächste Mönet findet de Louis au es diheime. 

 

S'erste mol hani au erlebt, wies isch wenn neui Chinder is Heim chömet. Mir hend Zuewachs vo 2 chline Würmli becho, würkli Würmli. 

D'Sakmeth Elizabeth (mer nennet sie Eli isch chli eifacher...) isch zu eus cho, wo sie grad mol 3 Täg alt gsi isch.... Sie isch nur 2 Kilo schwer und ihres Mami het sie welle verchaufe uf de Stross in Quito und drum isch sie jetzt bi eus. Leider isch sie ned so guet eh de Ufnahm vo de nahrig und het s'Milchpulver ned ahgno und denn het en Tia, wo ehres Baby diheime gstillt het jede Tag abpumpt und mer hend sie met ehrere Milch gschöppelet, was au viel besser passt het, aber leider isch sie momentan sit em 1. Mai em Spital, well ihre Körper d'Nährstoff ned richtig ufnimmt und sie z'wenig zuenimmt..... ich hoffe sie bald wieder bi eus z'ha und chönne schöppele.... es isch enorm, wie sehr dir die Chinder as Herz wachset und du würkli en Muetterrolle ihnihmsch... ich han nonie sones chlises Baby gse und s'erste mol, wo ich sie ghebt han, hani also wörkli Angst gha öpis z'kabutt mache, aber es bessers Training för ergendwenn, wenni sälber Chinder han, chönnti definitiv ned ha. Sobald sie wieder bi eus isch, wird ich es Update schriebe und ich bin mer sicher sie kämpft sich det dure au wenn ehre Start es Läbe alles andere als eifach gsi isch. 

 

Vor 2 Wuche hemmer endlich wieder mol en Bueb becho, de Matias (1 Monet alt) isch bi eus ihtroffe. Er isch zum Glück fit und munter und ist wie en chline Löi. Er isch s'allerschönste Baby, woni je gseh han. Wenni chönnt, wördi ehn am liebste met hei neh... sone süesse Bolle. 

Wie obe scho erwähnt isches in Ecuador es riese Problem, dass ned verhüetet wird. De Matias isch bi eus, well sis Mami 22gi isch und er ihres 4. Chind und sie hend kei Geld zum ihn ernähre. Do wird eifach produziert, ohni ahd Folge z'denke... ich hoffe de Matias bechunnt ganz schnell es neus diheime und bis denn knuddli ehn liebend gern ganz fescht und viel! 

 

Joo wie ehr gsähnd, isch ziemlich viel los.... plus semmer grad am lerne laufe met em Isac, was also au ziemlich lustig isch und wunderbar z'gseh, was för Fortschritt die Chinder machet. Unglaublich wie sie sich eh de letschde 3 Mönet scho veröanderet hend und es isch so schön en Teil devo z'si..... 

 

 

Mini erste Ihdrück 12.02.2018

Mini ersti Wuche im Heim und minere Familie isch verbi und Zit zum wieder mol öpis schriebe!

Ich bin guet gstartet und füehl mich scho pudelwohl. 

Mini Gastfamilie isch wunderbar und ich han es schöns dihei. Zudem hemmer 4 Hünd und eini devo bechunnt gli Welpe... also was willi no meh?! 

Liebs Mami kei Angst, ich han ufd Frog vo minere Gastmuetter, eb ich eine mit hei neh will, mit schwerem Herze und dankend abglehnt ;-).... 

 

Ich schaffe jweils vo Mentig - Fritig 8.00-16.00 Uhr im Heim. 

S'Heim isch eh 2 Stöck unterteilt - unde sind die chline em Casa Bordeau / chli heisst vo 1.5 Mönet bis eppe 8i und total 14 Chinder momentan.
Im obere Stock isch s' Casa Esperanza mit Jugendliche bis zu 26i mit Behinderig jeglicher Art. Det sinds in Total 12, wo dete wohnet. Leider sind die zum Teil scho ihres ganze Läbe dete, aber zum Glück hends dete au es schöns diheime gfunde. 

Mit mir isch hetzt no en andere Freiwillige us Österich und mir wechslet eus täglich ab, ein Tag unde und denn ein Tag obe, was en super abwechslig dribringt und du alli kennelernsch und dich ned vo eim "Hus" abschottisch. Viel Aktivitäte machet mit au zäme. 

Was mach ich eigentlch de ganz Tag? Arbet hets gnueg, glaubet mer... do wird's eim nie langwillig, da mer jo die Chinder/Jugendliche nie usem Aug set loh, wells suscht sicher en super Idee hend zum Seich mache. 

Bi de chline isches meistens so, dass wenn ich achome, de Tia's (das sind die Ahgstellte, die nennt mer Tante im Heim, wo 24h für alli do sind) und denn Hilf ich dene mit de Chinder wäsche, ahlegge, Haare mache, Zähputze etc. und bi natürlich en Spielkameradin für die wo warte müend. Denn wenn alli ready sind gömmer eigentlich immer use, ums Heim ume isch en riese Garte met Spielplatz und allem. Und denn wird gspielt, gshöppelet und so witter, bis es denn Znüni geht und denn gohts witter bis zum Zmittag. Bim Zmittag helfet mer de Chline und de Behinderte, wo ned selber esse chönnet oder selber no alles treffet ussert s'Mul und denn geht's es Mittagsschlöfli für die Chlinere.... natürlich isch denn ned Rueh. Die grössere chömet denn am 1ii vo de Schuel hei und sind ufdreiht und hen hunger. Ich be ehrlich, das isch de ahstrengendschti Part vo allem haha, die hend so viel Energie und findes mega lostig, dass ich sie ned immer verstoh und ziehnd sich gegesitig uf. Jedoch schaffe mer das au immer und denne werdet Husufgabe gmacht und nochdem natürlich gspeilt, spaziert, therapiert... alles mögliche :-). 

Ergendwenn melde sich denn wieder die chline und eusi allerchlinste hend natülich immer hunger und bruchet ganz viel nöchi. 

 

Im obere Stock laufts ziemlich ähnlich ab, nur dass mer dete halt eh gwüsse Sache d'Händ nochli meh Bunde sind, well das halt en ahspruchsb^volleri Pfelg isch und ich für das ned usbildet bin, aber trotz allem, bin ich immer am Bastle, Chetteli mache, tanze, singe. spaziere met de Blinde oder ihne wo em Rollstuehl sind. Es geht immer epis z'due!

S'schönste ah dem Heim find ich, dass alli glich behandlet werdet. Es isch egal, was für en Behinderig du hesch oder eb du gsund bisch, jede bechunnt s'gliche, und au dass en Rollstuehl keis Problem isch wenn mer en Wald goht, hani glernt. Isch zwar schwierig, aber total machbar... und jede bechunnt ganz viel liebi! Das isch enorm do, wie viel Liebi du de Chind gisch, das aber au zruggchunnt und es wird immer glachet. Fast immer, mengisch flüsset au Trändli, aber meistens isch das au zum schmunzle. 

 

So ich glaube gnueg verzellt, uf all Fäll, es goht mer super und ich bins richtig am gnüsse. S'isch würkli es super Projekt und falls öper meh Infos will, nur zue. Ich wirde kei Föteli vo de Chinder drufstelle, well ich das eifach ned korrekt finde so öpis is Internet z'due, falls es öper jedoch wunder nimmt, wieso, was und werum und es Föteli gseh möcht, chönnder mich gern persönlich froge. Nur eis chani sege, sie send alli zum uffresse süess! 

 

Mini erste Täg in Ecuador 25.1.2018

Sooo.. ich bi guet acho und bin mich am Ihläbe do in Ecuador. 

Nochdem ich glandet bin in Quito, bin ich am Floghafe abgholt worde und in eusi Unterkunft för die erste 3 Täg brocht worde. Todkabutt und ergendwie überwältig, dass das ganze jetzt real worde isch, bini go pfuse. 

Am nächste morge esches am 9ii losgange und ich han die andere Volunteers känneglernt. In Total simmer 10, ich be die einzig us de Schwiz. 6 us Dütschland, 2 us de USA und 1 Person us England. 

Die nächste 3 Täg also vom 17.-20. Januar hemmer demet verbrocht, viel über s'Land, euse Ufenthalt, euses Verhalte etc. z'lerne und enander besser kenne z'lerne. 

Sit em Fritig em 20. Januar wohn ich inere "Übergangsgastfamilie" in Quito, well ich jetzt bis am 2. Februar Spanischunterrich han und denne am 3. Februar nach Latacugna "zügle", wo ich denn bis im September bliebe. 

Ich leb jetzt binere Ecuadorianerin, mi abuela = mini Grossmuetter, sie isch super, redet zwar keis Wort Englisch, was das ganze mengisch chli lustig und hilflos macht, aber Gott sei Dank gihts Google Translate ;-). Und ich bin jo schliesslich do um SPanisch z'lerne. Sie chochet chli viel und het s'Gfüehl ich esse z'wenig und muess meh esse, ich glaube es sind alli so do.... haha - die esset au riese Portione (Riiis, Linse, Fleisch, Chäs und Koreander - mit dem bin ich mich am probiere ahfründe..). Zum Glück geht's do so viel feini und verschiedeni Frücht, isch echt es Paradies. So wit, so guet. Ich bin mini Zit do am gnüsse und jede Tag epis neus am lerne! 


Vorbereitige ih de Schwiz

Glücklicherwis han ich das ganze Projekt ned selber müesse organisiere, sondern grossartigi Unterstützig vo ICYE Switzerland becho. Mit de Hilf vo ICYE han ich ziemlich schnell Bscheid becho, dass es no es Plätzli frei het für mich in Ecuador mit Abreis Mitti Januar 2018. Spöter han ich dänn erfahre, dass ich ines Chinderheim chume in Latacugna, wie obe erwähnt. Zudem han ich s'Glück gha anderi Volunteer's z'träffe en Bärn, sowie Lüt usem Uland, wo ihre Ustusch bi eus eh de Schwiz machet. Momentan beschränke sich mini letschte Vorbereite druf, mis Visa z'becho, gnau überlege, was ich alles bruche und ihpacke muess und was no do eh de Schwiz erledigt wärde muess, sowie wem ich alles no Tschüss säge will.